განცხადებას თურქეთის ტრანსპორტისა და ინფრასტრუქტურის სამინისტროსთან არსებული ინფრასტრუქტურული ინვესტიციების მთავარი სამმართველო ავრცელებს.

პროექტის სახელწოდება „აღმოსავლეთ თურქეთის შუა დერეფნის რკინიგზის განვითარებაა“ და ის ორი კომპონენტისგან შედგება.

პირველი არის დივრიგი-ყარსი-საქართველოს საზღვრის სარკინიგზო ხაზის რეკონსტრუქცია-მოდერნიზაცია, რაზეც, დაახლოებით, 1.339.2 მლრდ დოლარი დაიხარჯება. მეორე კომპონენტი პროექტის მართვაა, რაც, დაახლოებით, 5,5 მლნ დოლარით დაფინანსდება.

მსოფლიო ბანკის მიერ დაფინანსებული კონტრაქტების შესყიდვები ბანკის IPF-მსესხებლებისთვის შესყიდვების რეგულაციების შესაბამისად განხორციელდება და ყველა კვალიფიციური კომპანიისა და ფიზიკური პირისთვის იქნება ღია, რაც აღნიშნული რეგულაციებით არის განსაზღვრული.

ცნობისთვის: იანვარში თურქეთის მთავრობამ „2053 წლამდე ტრანსპორტისა და ლოგისტიკის განვითარების გენერალური გეგმა“ (Transport and Logistics Master Plan 2053 – U2053) მიიღო, რომლის მიზანიც არის ქვეყნის გადაქცევა „შუა დერეფნის ლოგისტიკურ ბაზად”(“become a logistics base in the Middle Corridor”). მთავრობა „შუა დერეფნის“ სარკინიგზო ინფრასტრუქტურაზე ორიენტირებულ რამდენიმე საინვესტიციო პროექტს, მათ შორის, დივრიგი-ყარსი-საქართველოს საზღვრის რკინიგზის მოდერნიზების პროექტს განიხილავს, რომელმაც გრძელვადიან პერსპექტივაში დერეფანი მიმზიდველ სატრანსპორტო არტერიად უნდა გარდაქმნას. კიდევ ერთი დიდი პროექტი სტამბოლში, სულთან სელიმ იავუზის ხიდზე სარკინიგზო მიმოსვლის რეაბილიტაცია-მოდერნიზაციაა.